Паян  пирĕн  шкулта  Чăваш  чĕлхи  кунне  халалланă «Ялан янра, чăваш сăмахĕ!» уяв иртрĕ. Çак уявра шкул ачисем  хастар хутшăнчĕç.
Пĕрремĕш класс ачисем  И.Я. Яковлевăн «Эпĕ лаша шырама кайни» калава выляса кăтартрĕç. Иккĕмĕшпе виççĕмĕш классем «Уçăлма тухнă шăши çури», «Маттур Сысна çури» пьеса-юмахсемпе куракансене савăнтарчĕç.  Тăваттăмĕшсем  С.В. Элкер пултарулăхĕпе паллаштарчĕç.  Аслăрах ÿсĕмри ачасем «Утăмпала улма эп суйларăм», «Çеçен  хирти, ай, шур хурăн» юрăсене шăрантарчĕç.  Сцена çинчен чăваш юрри-сăвви ирĕккĕн, уççăн янăрарĕ. Ачасем  авалхи йăла-йĕркесене аван пĕлнине «Салтак ăсатни», «Ача-пăча вăййисем»  сыпăксенче  кăтартма пултарчĕç.
Ачасен  чăваш тумĕ куçа илĕртрĕ, чуна савăнтарчĕ. Пурте уявпа кăмăллă юлчĕç.